|
Instruments Quelques histoires |
Quelques histoires : Celtine
|
par Epistemon ... L’autre compte qu’on fait d’Hercules, ne vaut pas moins que le premier, & est que le pauvre desolé de la mort & mesmement telle de s’amie Pyrene, partant des terres de Bebrix aveque le troupeau qu’il avoit oté au susdit Gerion (c’estoient de bien belles vaches) & tenant son chemin vers l’Italie ou la Germanie, vint se refreschir chés un Roy de Gaule & des isles prochaines nomme Brettan, dont est venu le nom de Bretagne, j’enten & est a dire de l’isle que les Anglois ont despuis otee aus Brettons, laquelle nous nommons pour le jourdui Angleterre, premierement appellée, Albion, comme dit Ptolemee, & autres anciens : lequel Roy Brettan avoit aussi une galante filhe, & de bon vouloir, qu’on nommoit Celtine : laquelle aussi tost qu’eut veu ce beau ribaut d’Hercules, entra en si enragee amour, qu’elle luy fit finement cacher sa proie, & s’en vint sans plus languir tout droit, luy dire elle mesme (il ne luy estoit besoing d’autre truchement, car en ce temps là nous sçavions tous parler Gregeois en Gaule) - Beau Cousin, le bruit est, qu’estes le plus excellant champion du monde, et le plus ferme. Or je vous aime comme une desesperee, & faut que m’accolés, si voulés sçavoir nouvelles de voz veaus. Ce bon vacher aimoit bien ses bestes, mais plustost perdre tout l’honneur, qu’il avoit aquis de la conqueste d’Espagne, que refuser & esconduire la tant civile requeste de ladite suppliante. Conclusion il s’encrucha dessus pour voir ses beufs de plus loing, & Incontinant les lettres veuës. Ses vaches luy furent rendues : puis au trot, fouet. Madame Celtine fit si bien son profit de cet amour, que dedans quelques mois en sortit un beau petit filhot, qu’on nomma Celte, qui fut apres Roi en la Gaule, & du nom duquel furent despuis les Gaulois appellés Celtes, & la Gaule Celtique, ce jurent ils. Copyright Université de Tours - http://www.cesr.univ-tours.fr/Epistemon/cornucopie/C4.asp |